![](https://www.alhakika.info/sites/default/files/FB_IMG_1658884070307.jpg)
جيت لنواكشوط راجع من تجگجة ارگدت جاني الفقيد لابس دراعة من صان دسيه بيظة أوقاتو سيرها اكحل ؤگاللي امشيت عني مزلنا افگفت لخبار اكصر وذنيك واطرح عنك تلفون ذا ماهو بث مباشر ؤلاهو صور وانا ماعندي بنكيلي ؤفظتي اتجي الل لا حركتلها ألها السلك وايلا جات امع كوي تعطي زايد اعل اعشرتيام ، اللي اتگول الليلة اللي كتلوني فيها الگوم ليلة حاميه ؤذاك اللي اجابدو اعليه الگوم واشريف ما احظرتلو لا يفرگ لامتهم وانا متنقس نعرف عن اللي بين اعمارة ولد اعميرة واعمارة ولد اعلي اللا اللي بين كرعيهم طالعين لمطاليع .
گلتلو انتوم حصار تجگجة اشوسالكم امعاه مولان؟
عموما اخلگ اللطف إلين خرفت البيظان گاملهم التشباش واحكاو النسيب وأطاير منهم قدر واعدين أهاليهم ؤنحن امللي عندنا لمزرنف والدشر اعل كدية ؤگفر اندر ما اسها عن والمكاتبية اشتمرت امعانا اول ابن المقداد ماهوباخل شي والشيوخ اللي كاتبونا سامعالهم الناس يغير باط أهل مولاي اسماعيل ماواگف شي بين عينيهم والبيظان امحجبينلهم احجاب درس ؤفاصل عاد فالتبطيل
فصلي اشوي حول مشروع اتراب البيظان ؟!
أهيه اتراب البظان اتسنتي من آدرار ايفوغاس إلى لبحر لخظر ومن أگليميم بل امنين سنتات لعمامة الكحلة وافرغ آرگان إلى بحر اولاد ازناگية وانا ارسمتلها خريطة ؤدافعت عنها شور اهل لخيام ففرانصة يغير انهرات اللي اتوفيت فيهم گطت فرنسا بيظان موريتان من بل امنين اتمعلمو امدافع اولاد البيظانيات إيفوغاس فأزواد وامدافع اهل اساگية ؤتيرس ؤلحمادة ، شفت عن ذا ما اتلَ مودارك ؤجات اعل ذاك حرب الصحراء ودايگت عرب أزواد واتوارگو شفت عني معذور انا اندور ننترهم راگب والقدرة نتترهم التحت والجهد ماهو متگاد
ايوا شفتك مانك داير الشرفة افلوجه ؤذاك ما افهمتو ؟!
انا افطن الشرفة اصلح اللي عدلولي عنهم كتلوني يغير گاع الحمد لله ذو اللي كتلوني الل هوم تاژنتهم گال بن خلدون عن الشريف التلمساني لا يشكك في نسبه إلا مكابر ، واكتيل النصارى عندكم انتوم المسلمين إدل الل اعل شي مطابق ، يغير لاتنسا عن اشريف ماهو كاتلني وحدو گوم اهل التناكي فم
اشظاهرلك فالعشرية
عشرية فيها ياسر من التحامل اعلينا واعل تيفلاشن يغير الل انگولك عن اصاحبنا صبارة خطاو عنهم ذاك من التاريخ والحملات ؤگعدو عن اژعافگو لين گفاوْ، يغير امللي الل حد يتفگد عن رمزية المقاومة والجهاد أكثر إقناع للروح الوطنية من غيرها ، ؤيسوا كانت المهادنة وضعت لبنة للكيان المركزي البيظاني الوحيد ،ؤبالنسبة لولد عبد العزيز زعيم العشرية الل يعگب تنحل مشكلتو اصنادرة بيناتهم يداسرو يغير ما يداصرو ، اللي مفرط فاستخدام القوة الل تياب اصنادرة
ؤظرك لاهي نتوادعو إلى وقت اوخر ، بلغلي اسلام لأهل تفرغ زينة ؤگولهم عن ذاك ذاكهو